Na Galipedia, a wikipedia en galego.

A situación xeográfica de Arzúa, como a de outros moitos concellos do interior, condiciona a súa evolución demográfica, trazada en termos negativos dende a década dos sesenta e considerablemente envellecida (o 27% ten máis de 65 anos).

Logo de que o municipio superase a cifra dos 10.000 habitantes nos anos corenta e cincuenta, os sesenta comezaron a anunciar unha sangría (provocada polo abandono do campo e polas diferentes vagas de emigración cara ás cidades máis industrializadas) que deixou ao concello con pouco máis de 9.000 habitantes ao inicio da década dos setenta, e con menos de 7.000 en todas as que seguiron.

O efectivo demográfico arzuán, segundo os últimos datos do Instituto Galego de Estatística (2006), é hoxe de 6.532 habitantes e a súa densidade de poboación de 42 persoas por quilómetro cadrado.

En canto á distribución territorial dos arzuáns, o 39% deles vive na capital municipal e o 61% restante no medio rural. Das 21 parroquias que conforman este último, a menos habitada é Tronceda, con 45 veciños, e a máis Santa María de Arzúa, que suma 336, en boa medida pola súa proximidade á vila.

Poboación de feito dende 1900 ata 1991

1900	1910	1920	1930	1940	1950	1960	1970	1981	1991
9.036	8.708	8.722	8.743	10.396	10.754	10.470	9.064	6.999	6.932
Fonte: INE

Poboación de dereito dende 1986 ata 1995

1986	1987	1988	1989	1990	1991	1992	1993	1994	1995
7.364	7.376	7.378	7.358	7.292	7.016	6.982	7.024	7.041	7.011
Fonte: INE

Series de poboación dende 1996

1996	1998	1999	2000	2001	2002	2003	2004	2005	2006
7.014	6.947	6.896	6.886	6.832	6.776	6.676	6.632	6.602	6.532
Fonte: INE